ថ្ងៃព្រហស្បត្ត៏ ទី១៤ ខែមីនា ឆ្នាំ២០១៣ ម៉ោង ០៧:២០
ខេត្តស្វាយរៀង ៖
រឿងរ៉ាវហួសចិត្តមួយបានកើតឡើង
ដោយសារតែគ្មានការយល់អធ្យាស្រ័យគ្នាបណ្តាលឱ្យមីងនិងក្មួយ
វាយតប់គ្នាដោយចោទថា
ក្មួយស្រីចងគោបន្លាយខ្សែឱ្យស៊ីដំណាំម្តាយមីង ។
ការផ្ទុះជម្លោះវាយតប់និងកាប់គ្នានេះ
គឺបានកើតឡើងខណៈក្មួយស្រីវាយម្តាយមីង
ពេលនោះកូនឃើញបងស្រីជីដូនមួយវាយម្តាយក៏ទាញបានកាំបិតបុ័ងតោ
កាប់បងស្រី៣កាំបិតចំក្បាលផុងលលាដ៍ ។
ចំណែកបុរសជាប្តីឃើញប្អូនថ្លៃកាប់ក្បាលប្រពន្ធ
ក៏យកព្រនង់ទៅវាយប្អូនថ្លៃចំកនិងក្បាលសន្លប់ស្តូក ។
មន្ត្រីសមត្ថកិច្ចប្រាប់ឱ្យដឹងថា
ករណីនេះបានកើតឡើងកាលពីថ្ងៃទី១១ មីនា វេលាម៉ោង៧និង៣០នាទីយប់
នៅភូមិជ្រៃធំ សង្កាត់ព្រៃអង្គញ់ ក្រុងបាវិត ។
ពាក់ព័ន្ធនឹងករណីខាងលើលោកវរសេនីយ៍ត្រីកែវ សុថា
នាយរងការិយាល័យនគរបាលព្រហ្មទណ្ឌកម្រិតស្រាល
ខេត្តឱ្យដឹងថា មុនពេលកើតហេតុស្ត្រីឈ្មោះជុំ ចន្ថា
អាយុ៤៧ឆ្នាំ
បានយកគោទៅចងឱ្យស៊ីស្មៅនៅក្បែរផ្ទះម្តាយមីងឈ្មោះសំ សាវី
អាយុ៥០ឆ្នាំ ដែលមានផ្ទះក្បែរគ្នា
ប៉ុន្តែដោយសារចងគោបន្លាយខ្សែបណ្តាលឱ្យគោទៅស៊ីដំណាំ
របស់ម្តាយមីង ។ ពេលនោះម្តាយមីងឈ្មោះសំ សាវី
ក៏ស្រាយចំណងខ្សែលែង
ធ្វើឱ្យក្មួយស្រីខឹងក៏ផ្ទុះជាជម្លោះរវាងម្តាយមីងនិង
ក្មួយស្រី។
ដោយកំហឹង
ក្មួយស្រីរូបនេះបានយកព្រនង់ប៉ុនកដៃវាយទៅលើម្តាយមីងចំ
ក្បាល២ព្រនង់ បណ្តាលឱ្យបែកដួលសន្លប់នៅនឹងកន្លែង
ស្របពេលនោះកូនប្រុសស្ត្រីរងគ្រោះឈ្មោះភុន សីហា អាយុ៣៣ឆ្នាំ
ឃើញបងស្រីជីដូនមួយវាយម្តាយខ្លួន
ក៏ទាញបានកាំបិតប័ុងតោស្ទុះទៅកាប់ឈ្មោះជុំ ចន្ថា
ចំនួន៣កាំបិតគឺ២កាំបិតចំក្បាលពីលើ
និងមួយកាំបិតចំចិញ្ចើមរងរបួសធ្ងន់ហូរឈាមស្រោចពេញផ្ទៃមុខ ។
ស្របពេលនោះបុរសជាប្តីស្ត្រីរងគ្រោះឈ្មោះកែវ នី អាយុ៥០ឆ្នាំ
ពេលឃើញប្អូនថ្លៃកាប់ប្រពន្ធខ្លួន
ក៏ទាញបានព្រនង់ប៉ុនកដៃស្ទុះទៅវាយប្អូនថ្លៃឈ្មោះភុន
សីហា ២-៣ព្រនង់ចំក និងចំក្បាលដួលសន្លប់នៅនឹងកន្លែង ។
ក្រោយកើតហេតុស្ត្រី២នាក់ម្តាយមីងនិង
ក្មួយត្រូវបានក្រុមគ្រួសារនាំយកទៅកាន់មន្ទីរពេទ្យបង្អែកស្រុក
ប្រតិបត្តិជីភូដើម្បីសង្គ្រោះ ។
ចំណែកបុរស២នាក់គឺបងថ្លៃនិងប្អូនថ្លៃ
ត្រូវសមត្ថកិច្ចចាប់ខ្លួនបញ្ជូនមកស្នងការដា្ឋននគរបាលខេត្ត
រួចកសាងសំណុំរឿងបញ្ជូនទៅសាលាដំបូងខេត្តចាត់ការតាមច្បាប់ ។
បុរសទាំងពីរនាក់
ត្រូវបានសាលាដំបូងខេត្តឃុំខ្លួនបណ្តោះអាសន្ននៅពន្ធនាគារខេត្ត
នៅថ្ងៃទី១៣ មីនា គឺឈ្មោះភុន សីហា និងឈ្មោះកែវ នី
រីឯស្ត្រីឈ្មោះជុំ ចន្ថា
ដែលរងរបួសធ្ងន់ក៏ត្រូវព្រះរាជអាជ្ញាធ្វើការចោទប្រកាន់ដែរ
តែឱ្យនៅក្រៅឃុំព្រោះមានរបួសធ្ងន់កំពុងព្យាបាល ។
អ្នកស្រុកមានការហួសចិត្តចំពោះម្តាយមីងដែល
គ្រាន់តែគោស៊ីដំណាំបន្តិចបន្តួចក៏ឈានដល់ការវាយនិងកាប់គ្នា
រហូតរងរបួសធ្ងន់២នាក់ដេកពេទ្យ
និងពីរនាក់ជាប់ពន្ធនាគារ ។ ពាក្យចាស់លោកបានណែនាំថា ខឹងខុស
ខឹងខូច ខឹងខាត
ដូចករណីខាងលើដោយខ្វះការយល់អធ្យាស្រ័យគ្នាទៅវិញទៅមក
ទើបសាច់ឈាមឯងបង្ហូរឈាមគ្នាបែបនេះ ៕
0 comments:
Post a Comment