ថ្ងៃអង្គារទី 12 ខែ កុម្ភៈក្រុមកម្មកររោងចក្រកាត់ដេរ យ៉ុងវ៉ា នៅក្រុងតាខ្មៅ ទីរួមខេត្តកណ្តាល
បានធ្វើកូដកម្មតវ៉ាដោយបិទផ្លូវជាតិលេខ២១
ពីរង្វង់មូលតាខ្មៅទៅកាន់ផ្ទះលោកនាយករដ្ឋមន្ត្រី ហ៊ុន សែន
នៅតាំងក្រសាំង។ កូដកម្មបិទផ្លូវនោះត្រូវបានធ្វើឡើង
ចាប់តាំងពីព្រឹកម៉ោង ៦និង៣០នាទី រហូតដល់ម៉ោង៣រសៀល
ដោយមិនទាន់មានដំណោះស្រាយណាមួយពីអាជ្ញាធរ
ហើយភាគីថៅកែរោងចក្រកាត់ដេរ
ក៍មិនបានចូលខ្លួនមកសម្របសម្រួលឡើយ។
កម្មករ
ជាង ៧.០០០ នាក់ នៅរោងចក្រកាត់ដេរ យ៉ុងវ៉ា១ និងយ៉ុងវ៉ា២ នៅតាខ្មៅ
ខេត្តកណ្តាល បានធ្វើកូដកម្មឈរបិទផ្លូវជាតិលេខ២១
ដើម្បីជំរុញឲ្យអាជ្ញាធរចេញមុខសម្របសម្រួល
ដោះស្រាយជាមួយនឹងថៅកែរោងចក្រកាត់ដេរ
បើកប្រាក់ខែដល់កម្មករសម្រាប់ខែមករា
ប្រាក់អតីតភាពការងារនិងប្រាក់អត្ថប្រយោជន៍ដទៃទៀត។ កូដកម្មនោះ
មិនមានអំពើហិង្សា វាយបង្ក្រាបក្រុមកម្មករតវ៉ាឡើយ។
តំណាងកម្មករតវ៉ា អ្នកស្រី ចាន់ ដានី បានអះអាងថា
ថៅកែចិនបានរត់ចោលរោងចក្រ ចាប់តាំងពីខែធ្នូ ឆ្នាំ២០១២។
អ្នកស្រីបន្តថា ក្រុមកម្មករបានបំបែកការជួបជុំតវ៉ាបិទផ្លូវ
កាលពីម៉ោង ៣រសៀល ហើយនឹងបន្តជួបជុំនៅថ្ងៃស្អែក
និងបន្តតវ៉ារហូតដល់មានដំណោះស្រាយ។
ចំណែកលោក អាត់ ធន់
ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា C.CAWDU
ដែលបានតាមឃ្លាំមើលកម្មកររោងចក្រកាត់ដេរតវ៉ា បានឲ្យដឹងថា
រោងចក្រកាត់ដេរ យ៉ុងវ៉ាទី១និងទី២ ត្រូវបានក្រសួងការងារអះអាងថា
ត្រូវបិទទ្វារលែងដំណើរការ។ ម្យ៉ាងទៀត ក្នុងខែមករាកន្លងមក
កម្មករមិនមានការងារអ្វីធ្វើទេ។ ដូច្នេះនៅថ្ងៃអង្គារនេះ
កម្មករទទូចសុំឲ្យអាជ្ញាធរ និងរាជរដ្ឋាភិបាលមេត្តាគិតគូរដល់កម្មករ
ដោះស្រាយបើកប្រាក់ខែនិងប្រាក់អត្ថប្រយោជន៍នានាឲ្យដល់កម្មករជាង
៧០០០នាក់។
មេដឹកនាំសហជីពលោក អាត់ ធន់ ក៏បានបន្ថែមថា ក្រុមកម្មករ
ក៏បានដាក់ពាក្យបណ្តឹង
ទៅកាន់តុលាការខេត្តកណ្តាលឲ្យចេញដីការក្សាការពារ
ដើម្បីកុំឲ្យក្រុមហ៊ុនដឹកសំភារៈរោងចក្រចេញបាន
មុនពេលដោះស្រាយប្រាក់ខែ និងប្រាក់អតីតភាពការងាររបស់កម្មករ។
ចំណែកសហជីពសេរីកម្មករ របស់លោក ជា មុនី នៅថ្ងៃ១២ កុម្ភៈនេះ
ក៏បានសរសេរលិខិតមួយច្បាប់ជូនលោក វ៉ាន់ ស៊ូអៀង
ប្រធានសមាគមរោងចក្រកាត់ដេរនៅកម្ពុជា
ដើម្បីស្នើសុំធ្វើអន្តរាគមន៍ឲ្យក្រុមហ៊ុន យ៉ុងវ៉ា
បើកប្រាក់ខែសម្រាប់ខែមករា ឆ្នាំ២០១៣ ឲ្យកម្មករ
និងទូទាត់ប្រាក់ផ្សេងៗបន្ទាប់ពីការបិទមិនដំណើរការរោងចក្រ។
ក្នុងដើមឆ្នាំ២០១៣នេះ មេដឹកនាំសហជីពកម្មករ លោក អាត់ ធន់
កត់សម្គាល់ថា
កូដកម្មរបស់កម្មករកាត់ដេរហាក់ដូចជាផ្ទុះឡើងច្រើនកន្លែង។
រោងចក្រកាត់ដេរមួយចំនួន បានបិទទ្វារ ដោយមិនទូទាត់ប្រាក់ខែ
និងប្រាក់អត្ថប្រយោជន៍នានា ស្របតាមច្បាប់ការងារដល់កម្មករឡើយ។
ក្រុមកម្មករក៏បានចុះតាមផ្លូវធ្វើកូដកម្មទាមទារតម្លើងប្រាក់ខែ
ដែលសព្វថ្ងៃទទួលបានត្រឹមតែ ប្រាក់ខែគោល ៦១ដុល្លារប៉ុណ្ណោះ។
អំពីប្រាក់ខែកម្មករ លោក អាត់ ធន់ បានឲ្យដឹងថា
មេដឹកនាំសហជីពកម្មករធំៗចំនួន៦
ដែលជាសមាជិកក្រុមការងារទំនាក់ទំនងវិជ្ជាជីវៈ
នឹងជួបប្រជុំគ្នាពីរថ្ងៃ នៅថ្ងៃទី១៨និងថ្ងៃទី១៩កុម្ភៈ
ដើម្បីកំណត់ជំហររួមលើការទាមទារប្រាក់ខែអប្បបរមាដល់កម្មករកាត់ដេរ
មុននឹងលើកសំណើនោះ ដាក់លើតុចរចាជាមួយថៅកែរោងចក្រកាត់ដេរ
និងតំណាងរាជរដ្ឋាភិបាល នៅថ្ងៃទី២៦ កុម្ភៈ។
លោក អាត់ ធន់
នៅតែរក្សាជំហរទាមទារការតម្លើងប្រាក់ខែអប្បបរមាអោយដល់កម្មករ
កាត់ដេរ ឲ្យបានចំនួន១៥០ដុល្លារអាមេរិកក្នុងមួយខែ
ដើម្បីឲ្យកម្មករកាត់ដេរជាង៤សែននាក់ មានកម្រិតជីវភាពរស់នៅសមរម្យ៕
0 comments:
Post a Comment